घणी डिये पहले ची बात छे, हेके गांवा मां बाबा रहता। ओ गांवा चे लारे ची बन्दी आपणिया सम्ससिया ते पिरोसानिया चा हल कढ़ावणे कल्ले बाबे कन्नू आती। बाबा वाचिया पिरोसानिया चा हल काढ़ता। हेक डियो हेके जुवान ने बाबे कन्नू पूछले, गुरजी, ए मोल्ख मां खोस्स रहणे चा राज का छे? बाबा ब़ोडला, बेटा तू माये लारे जंगल मां चाल, में तन्नू उट्ठे ए मोल्ख मां खोस्स रहणे चा राज बावड़ी। ओच्चे बाद बाबा ता ओ जुवान जंगल डुस चहाले गेल्ले। जंगल चे रस्ते मां टुरते बेल्हे बाबा ने हेक बडा सारा फत्थर चिल्ला ता ओ जुवान नूं डित्ती कन्न ब़ोडला, ए फत्थर नू चा ता माये लारे-लारे टोर्र। ओ जुवान ओ फत्थर चित्ती कन्न बाबे चे लारे-लारे टुर्रू लागती गेल्ला। घणी देर चे बाद ओ जुवान चे हाथ मां रड़ा मचू लागती गेल्ला मगर ओ चोप्पचाप टुरता रहला। जिसे बेल्हे टुरते-टुरते घणी देर हुत्ती गेल्ली ता ओ जुवान कन्नू रड़ा सहन नी हुल्ला ता ओण्हे बाबे नूं कहले, बाबा मन्नू हाथ मां घणा रड़ा हुवे पल्ला। बाबा ब़ोडला, बेटा ये फत्थर नूं तू तले महेल जत्ती। फत्थर नूं तले महेलते ही ओ जुवान चे जान मां जान आल्ली।
बाबे ने ओ कन्नू पूछले जिसे बेल्हे तू फत्थर नूं आपणे हाथ मां चल्ली फिर्रे ला। ओ बेल्हे तन्नू किसड़े लागे पलते ले। ओ जुवान ब़ोडला, गुरजी, सुरू मूं रड़ा थोड़ा हुत्ता ता माया सारा ध्यान दुद्धे पे हुत्ता ता फत्थर पे कम हुत्ता। मगर जींवे-जींवे रड़ा बधता गेल्ला ता माया ध्यान दुद्धे पे कम ता फत्थर पे जादा हुत्ती गेल्ला। हेक वारी ता माया सारा ध्यान फत्थर डुस हुत्ती गेल्ला ता में हेको फत्थर चे बारे मां सोचू लागती गेल्ला। बाबे ने ओ कन्नू बलति पूछले की हिम्मा फत्थर नूं तले महेलती कन्न तन्नू किसड़े लागे पल्ले। ओ जुवान ब़ोडला, गुरजी फत्थर नूं तले महलते ही मन्नू चेन आल्ला ता खुस्सी मसूस हुल्ली।
बाबा ब़ोडला, हा छे, खोस्स रहणे चा राज। ओ जुवान ब़ोडला , गुरजी में कस्सा वी कोन्हीं समझला। बाबे ने ओन्हूं समझाले ते बावड़ले की फत्थर नूं कतरा जीं देर चवणे पे तन्नू थोड़ा रड़ा हुल्ला ता घणी देर चवणे पे घणा रड़ा हुल्ला। यूं ही अगर अम्हीं डोक्ख चे बारे मां सोचते रिहूं ता डोक्ख बधते जाये ता अम्हीं घणे डुक्खी ते उदास रिहूं । हा अमचे पे खोद्द निरभर करे की अम्हीं डोक्ख नूं कितनी देर चवणा चाहूं। ए सांगू अगर तम्हीं खोस्स रहणा चहावा ता आपणे डोक्ख चे फत्थर नूं जलति-जलति तले महेल जत्ती ता अगर आपणे बस मां हुवे ता ओन्हूं कड्डी चवा ही ना।
- टिपणी डाक करा
