अकबर ने कड़ाके चे पाले मां एलान करला की जक्को बन्दे सारी रात आधे डुब़ती कन्न पाणिया मां भिल्ले रिही ता में ओन्हूं हेक हजार मोहरा एनाम मा डी। हेक गरीब धोब़ी ने आपणी गरीबी दुर करणे कल्ले सारी रात ठाडे पाणिया मां भिल्ला रहला, बाद मां ओ एनाम गहणे कल्ले बादसा चे महल मां गेल्ला। बादसा ने ओ कन्नू पूछले, तू किवें बेन्न नुहले सारी रात भिल्ले-भिल्ले नद्दी मां बिताली। ता कन्नू का सबूत छे। धोब़ी ने उत्तर डिल्ला, महाराज नद्दी लारे जक्को महल छे, ओच्चे मां हेक डिवा ब़ले पलता ला, ओन्हूं डेखती कन्न में सारी रात नद्दी चे ठाडे पाणिया मां बिताली हुत्ती। एच्चा मतलब तू डिवे ची गरमी लारे सारी रात नद्दी चे पाणिया मां भिल्ला रहला ता हिम्मा एनाम गेहणा चहावी। ओण्हे आपणे सिपाया नूं कहले, एन्हूं जेल मां ढकती नाखा।
बीरबल वी उट्ठी भिलता ला, ओन्हूं हा डेखती कन्न घने बुरे लागले की बादसा गरीब बन्दे पे कहर ढावे पल्ला। नेरे डियो बीरबल महल मां कोन्हीं आल्ला ता ओ डियो जरूरी पंचेत हुत्ती। बादसा ने ओन्हूं हकारणे कल्ले सिपाया नूं भेजले। सिपाया ने आती कन्न कहले की बीरबल खिचड़ी चाहड़े पल्ला ता खिचड़ी खाती कन्न आवी। बीरबल घणी देरी तक नी आल्ला ता बादसा खोद्द उट्ठे पुजती गेल्ला। बादसा ने डेखले, हेक बडे डण्डे पे घड़ी ब़ांथी कन्न ऊंची टांकती नाखली ता तले कतराखते ब़ालती नाखले। ओच्चे लारे बीरबल खाट नाखती नुहला पलता ला। बादसा घुस्से मां ब़ोड़ला, केचा तमासा बणाली भिल्ला। यूं वी कड्डी खिचड़ी पके वे। बीरबल ब़ोड़ला, महाराज जरूर पक्की कां नी पक्की, यूं ही पक्की जीवें धोब़ी नूं महल चे डिवे ची गरमी मिड़ली हुत्ती। बादसा नूं बात समझी मां आती गेल्ली। ओण्हे बीरबल नूं गलकड़ी घाली ते धोब़ी नूं छोड़ती कन्न ओच्चा एनाम डिल्ला।
