हेक ससस्य हुत्ते । उं घुमत्ते-फिर्रते गां पुज्जती गेल्ले ।ओच्ची दीद गुडा चे भेल्ले पे पड़ली । ओण्हे सोचले, कित्तणे आच्छे हुव्वे अग्गर मन्नू कत्तरा जा गोड़ खाणे कल्ले मिल्लती जाये आ । किंवे ? चोरी कर्रे । कोन्हा,चोरी करणा बुर्री बात्त छे । कां ना दकानदारा कन्नू कत्तरा जा गोड़ मांगत्ती गिहे । ओ मन्नू गोड़ डी जत्ती । ओ दकानदारा कन्नू गेल्ला ता बोड़ला , तू बडा दय्यालू छी,दुध्धा धन्धा बध्धी । कां तू मन्नू कत्तरा जा गोड़ डिये। ससस्य ची बात्त सुणती कन्न दकानदार खोस्स हुत्ती गेल्ला । ओण्हे ओन्हूं गोड़ डिल्ला जत्ती । ससस्य गोड़ चत्ती कन्न जंग्गला डुस्स दरोड़ती पल्ले ।उं बणा तल्ले बेस्सती गोड़ खाणे नूं लाग्गत्ती गेल्ले । इत्तणे मां उठ्ठे हेक लोम्बड़ी आत्ती गेल्ली । विन्नू डेखत्ती कन्न ससस्य ने गोड़ लक्कोला जत्ती ।लोम्बड़ी घणी चलाक हुत्ती ।वा बोड़ली,“तू गोड़ किठ्ठू चत्ती आल्ला ?” मन्नू बावड़ , नातण में तन्नू मारत्ती नाख्खी। ससस्य बोड़ले,“तू मन्नू ना मार,में तन्नू बावड़े ।गांवां मां हेक्की दुकान्नी पे घणा सारा गोड़ पल्ला । तू उठ्ठे जायो । दकानदारा कन्नू गोड़ मांगत्ती गिहो। ओ तन्नू गोड़ डी जत्ती । अच्छा,चोप्प कर में समझती गेल्ली ।
लोम्बड़ी गांवां मां गेल्ली । विणे दुकान्नी पे गुड्ड़ा चा ढेग्ग डेखला । वा गोड़ डेखत्ती कन्न सोच्चू लाग्गत्ती गेल्ली की ससस्य ता मुरख हुत्ते जक्को कत्तरा जा गोड़ चत्ती कन्न खोस्स हुत्ती गेल्ले ।में ओच्चे आल्लीकर हिणी कोन्ही । में दकानदारा नूं धमकात्ती कन्न घणा सारा गोड़ गिही । वा दकानदारा लारे गेल्ली ता अकड़ित्ती कन्न बोड़ली,तू बड़ा बईमाण छी ,सोदा कम्म तोली वी । मन्नू गुड्ड़ा ची भेल्ली डे नातण में दुध्धी सारी पोल खोलत्ती नाख्खी । दकानदारे सोचले,अच्छा तू मन्नू धमकी डी पल्ली रोक्क में तन्नू मज्जा चखावे । ओ बोड़ला , तू बेस में दुध्धे कल्ले गोड़ चल्ली आव्वें । लोम्बड़ी खोस्स हुत्ती गेल्ली । दकानदार भीतर्र चाहला गेल्ला ।ओण्हे गुड्ड़ा चा इस्सड़ा बोरा डेखला जिस्से मां घणियां सारियां किड़ियां घिर्रलियां पलतियां । ओ बोरा चत्ती कन्न बहारू आल्ला ।ओण्हे लोम्बड़ी नूं केहले जित्तणा आच्छा लाग्गे उत्तणा चल्ली जा । लोम्बड़ी जीव्वें बोरे मां हात्थ नाखला । सारियां किड़ियां विच्चे हात्था नूं बिक्कती गेल्लियां । किड़ियां विन्नूं पट्टू लाग्गत्ती गेल्लियां । लोम्बड़ी जोरा-जोरा चे आपणे हात्था नूं भोहें पे छन्डकू लाग्गत्ती गेल्ली । विच्चे हात्था पे सट्ट लागत्ती पल्ली ता वां जंग्गला डूस्स दरोड़ती पल्ली । लोम्बड़ी रोला मच्चाली गेल्ली,मन्नू दुध्धा गोड़ नी चाही छे , दुध्धा गोड़ ता खाराजहार छे ।
शिक्षा :- मीठ्ठे बोलणे हम्मेसा आच्छे रिहे वे ।
इस्सड़े बोला जक्को काये मन्ना नूं भावणे चाही छे ।
