हेक वारी हेक खज्जी चे बणा तल्ले सस्ये ते गीद्दड़ छाईं मां बेसती कन्न साईं काड्डी बहेलते ले। हेकदम का हुल्ले कि खज्जी चे बणा कन्नू खोपरा तर्रुटती कन्न तल्ले डेल्ला। ओ जीवें भोहें पे डेल्ला ता भोहें काप्पूं लाग्गती गेल्ली। सस्ये कहले, गीद्दड़ा नूं यार भोहेंअम्ब आत्ती गेल्ला। गीद्दड़ डरती कन्न दरोड़ती पल्ला। आगू गीद्दड़ ते भास्सू सस्ये हुत्ते। वान्हूं गेली मां हात्थी मिड़ला। हात्थिया ने वा कन्नू पूछले, तम्हीं डोन्हीं कां दरोड़ते जावा। गीद्दड़ हांपती कन्न बोड़ला, भोहेंअम्ब आत्ती गेल्ला। हात्थी वीं डरती कन्न दरोड़ती पल्ला। आगू हात्थी, हात्थिया भास्सू गीद्दड़ ते गीद्दड़ा भास्सू सस्ये हुत्ते। वान्हूं जक्को वीं मिड़ले वाण्हे वान्हूं कहले कि भोहेंअम्ब आत्ती गेल्ला। सारे जंग्गला मां हा हू मचती गेल्ली।
सारी जानवरें इंग्गे-उंग्गे दरोड़ू लाग्गती गेल्ली। सेरा ने डेखले ता ओण्हे वां कन्नू पूछले, तम्हीं सारे कां दरोड़ते फिर्रा। वाच्चे मूं हात्थी बोड़ला, महाराज जंगला मां भोहेंअम्ब आत्ती गेल्ला। सेर बोड़ला, तम्हां नूं किवें पत्ता लागला कि जंगला मां भोहेंअम्ब आत्ती गेल्ला। सारे जानवरां ने कहले कि अम्हां नूं तां गीद्दड़ा ने बावड़ले हुत्ते। सेरा ने गीद्दड़ा कन्नू पूछले, तन्नू किवें पत्ता लागला कि जंगला मां भोहेंअम्ब आत्ती गेल्ला। गीद्दड़ बोड़ला, महाराज मन्नू ता सस्ये ने बावड़ले हुत्ते। सेरा ने सस्ये कन्नू पूछले, तन्नू किवें पत्ता लागला।
सस्ये बोड़ले, महाराज तूं माये लारे चाल में तन्नू वा जगां डिखाणे। जंगला ची सारी जानवरें ओच्चे लारे टुरती पल्ली। सस्ये वान्हूं खज्जी चे बणा कन्नू गेहती आल्ले। सेर बोड़ला, किट्ठो भोहेंअम्ब। सस्ये बोड़ले, महाराज में खज्जी चे बणा तल्ले बहेलता ला। खज्जी चे बणा कन्नू खोपरा डेल्ला ता भोहें काप्पूं लागती गेल्ली । में गीद्दड़ा नूं कहले कि भोहेंअम्ब आत्ती गेल्ला ता गीद्दड़ा ने सारे जंग्गला मां रोला मचात्ती डिल्ला कि भोहेंअम्ब आत्ती गेल्ला। सेरा ने सारे जानवरां नूं बावड़ले कि हा भोहेंअम्ब थोड़ी छे। सस्ये ने तम्हां सारा नूं उल्लू बणाले।
शिक्षा- कड्डी वीं नेरा चा बात्ता सुणती कन्न रोला नीं मचावणा चाही छे।
